الفرس ( الألفيه )
الف اولف من عجايب زماني=قافٍ يشوق مصرفين المعاني
مدام لي شف من بعيد وداني=ما جاء على بالي نطق به لساني
**
والباء بديت القيف وابديت ماخفيت=اسباب من ما شفت بالعين واريت
ياليتني مع سوق مستور ما جيت=رديت مقفي لا تعدى مكاني
**
التاء ترا ماجاء على العبد مقسوم=خيره وشره بين حجاه مرسوم
لا شك ذا معطى وهذاك محروم=وانا من التوفيق حظي رماني
**
الثاء ثبت عندي ولا به رواية=ان الهوى والحب سبة عمايه
لا وآعناي من الهوى وآعنايه=بالصاحب اللي قل شوفه براني
**
الجاء جحدت الحب والحب غربال=جرحه عميق وجارح الحب سلال
والناس ما يدرون وش علة الحال=وانا جروحي من سخيف المثاني
**
الحاء حرمني لذة النوم فرقاه=الصاحب اللي حملن حمل ما قواه
ياليت كلن ساكنٍ ماه بلزاه=ولا عنيت لصاحبي ماعناني
**
الخاء خفيف الدم قصده يجازين=عن ما مضى من عشرته يوم هو زين
واليوم يوم العين قرنت على العين=جازان بالسيات عقب الحساني
**
الدال دريت بغايته وش مرامه=عرفت مقصوده بلهجة كلامه
يبين اجر النوح مثل الحمامة=وأجاوب الورقات جر الغواني
**
الذال ذابحني همه وكيده=همه كبير وكل يوم يزيده
اللي طعونه بالضماير جديدة=له مخطر بالكبد حرّه كواني
**
الراء ربيع القلب ذكره وشوفه=حتى ايش لو طالن من اجله كلوفه
ابتصبر كود يجلى الحسوفه=وابرد غليلي من غصين اللياني
**
والزاء زريف الطول غضة نهوده=لا بالقصير ولا دقاق طويلة
لا وآعذابي من طويل الجديلة=جدد كواي بالضلوع المحاني
**
والساء سهوم الحب ماهي خفية=دايم صويب الحب عينه شقيه
لو قلت مابه علته باطنية= كني غضيض الغلث والحيل واني
**
والشين شوفي له عذاب بلا خير=حير قدم رجلي عن السير لاسير
والكبد عسكر به ثلاثة مسامير=ولأحدٍ يقول أخطيت يا مودماني
**
الصاء صويب الحب خطر على الروح=جرحه جرح روحي وأنا قبل مجروح
ياقاتل المغرم ترا منت مسموح=تركض على قتلي عياناً بياني
**
الضاء ضدي ما يسوي سواياك=يرمي على همش الخبر بس مناك
ولا انت جارحني بحبك وبلواك=ليت الولي في عشرتك ما بلاني
**
الطاء طويت الياس من شفت خلي=لاهوب جافيني ولا صافيٍ لي
وأنا عذرت من الدلع والتغلي=يكفين من طرد الهوى ما وطاني
**
الظاء ظروف الوقت ترمي بأهلها=طاوعت عينٍ مغرمه في عملها
أيام روحي داويه في جهلها=واليوم عنّيت الفرس بالعناني
**
العاء عذلت النفس عن عشرة الناس=ما شفت من طرد المقفين نوماس
من لا يسّوس قصر حبه على ساس=لا بد ماياقع رفيع المباني
**
الغين غبت وغاب عني خياله=ماعاد يطري لي غلاه ودلاله
كلٍ يبي يمشي على شف باله=لا صار ماشانه يوافق لشاني
**
والفاء فضحني بالتردد ولا فاد=همي عليه الرجل مسداد مرداد
من عند بابه مير حتى ايش وش عاد=لا صار مالي من نمى البردقاني
**
القاف قلت من التردد بلا فود=عيب ومن ما يلحق الرجل منقود
واللي يعرف النقص ويثمن الزود=يصبر على حد القسى واللياني
**
الكا كفاني ما فجعني وعنان=من عشرة اللي عقب عرفه تناسان
خان الزمان وبدل الود هجران=والعلم لو ان تجهله ما خفاني
**
واللام لومي عقب ماقفيت منا=كاني على فرقاه جريت ونّا
بالعين ابو قلب الى اقفى يحنا=لا من بني عمي ولا من عواني
**
والميم مالي عقب شفت الممله=ارضى على نفسي بالعناء والمذلة
لأنصك بابٍ يفتح الله محله=لااقفى شهر شعبان هل رمضاني
**
والنون نامت واسفهلت عيوني=طويت ياسي واستراحت شطوني
ما قول وآعزاه لا وآغبوني=حقٍ علي اخفي وليف جفاني
**
الهاء هني اللي مريحٍ ومبسوط=ولا عذاب الحب شوط باثر شوط
دام الهوى ياهل المودة هوى نوط=ما ظنتي عشرة تشد الثماني
**
والواو وسيع العرف ينكس الا شاف=صدق وجفاء ومظاهره غير مجناف
ياقلب ياللي من عناء الوقت ينلاف=أصفح إلى شفت الدهر قلبّاني
**
والياء يعين الله على العدل والميل=عبد عذر اعذر من القول والقيل
يارب حسن الخاتمة والتساهيل=وانك على درب الصلاح تهداني
**
تمت وصلوا عد مختلف الازهار=على النبي الهاشمي سيد الابرار
وآله وصحبة عد ماهب وإندار=نسم الهوى شرق وشمال ويماني
كلمات الشاعر المرحوم : حمد المغيولي
***
عرش الهوى
جرحتني برضاك وأنت متعني=تجرح حبيبٍ غايته بس يرضيك
لاتعتذر مقبول منك التجني=مر الحلو يحلى وكل الحلى فيك
يازين جرحك خافقي به يغني=لحن الوفا يازين جرحك بطاريك
اجرح هواك وسدد السهم عنّي=صوّب خفوقك وأرسمه في معانيك
رضيت حتى في قليل التمني=ياليتي ألقى لي وجودٍ بأمانيك
ملكتني والزود عندي يهنّي=عرش الهوى لازم يجيلك يهنيك
كلمات الشاعر : صالح البييبي
***
العبره
تعلمت أكتم العبره وأنا توي صغير=ياسعد هالأيام وياشين حظي
طال الصبر والحلم عدى عسى خير=لكن تجاوز كل معنى ولفظي
ماشفت له عنوان ماشفت تفسير=ضيعت عمري بين فتلٍ ونقضي
أشقيتني يازين عذر ومعاذير=يانور عيني يابعد كل غضي
يابهجتي مالي جناحين وأطير=كلي أجيلك أو يجي بس بعضي
كلمات الشاعر : بداح العلي
***
ليتَنِي
ليتني كُنتُ أغني لك مواويل الهوى
أو سَمعتَ الشدو منّي مع نُسيمات الهوى
***
ليتني طيراً أغني مثل عصفور الصباح
حينما غنى وطار مُرسلاً أشجى النواح
***
ليتني أبقى أسيراً للهوى والذكريات
وجراحي بلسمُ القلبِ وعطر الأمنيات
***
ليتني كُنتُ الخيالَ
في سماءِ الأمسيات
أو سراباً من بقايا
حب ماضي للراوة
ليتَنِي كنتُ أغني !
كلمات الشاعر : صالح الكعيد
***
بآخر كلام
بآخر كلام
حبيت اوضح وش حصل
حتى السلام
من شد شوقي ماكمل
الشوق فيني ما طفى
والقلب حبك واكتفى
وباحلى غرام
حبيت اوضح وش حصل
باحلى غرام
ذكراي انتي والامل
بعد وخصام
والشوق لعيوني وصل
رجواي انتي يارجا
يا اغلى حبٍ في هوى
بعد وخصام
حبيت أوضح وش حصل
كلمات الشاعر : الجناح
في النهايه أحب أشكر أخي الغالي مفتون الفن لجهده الكبير في نقل القصائد .
هذه الرسالة تفيد بأنك غير مشترك معنا. لتسجيل الرجاء اضغط 
